Празникот Водици народот го празнува како еден од најголемите христијански празници, зашто на тој ден според верувањето Исус Христос е крстен од Свети Јован Крстител во реката Јордан. Со празникот се поврзуваат многу обичаи кои ги практикуваат кумановци. На Богојавление главниот настан е фрлање на крстот во водата. Се верува дека тој што ќе го фати крстот ќе биде среќен цела година. Тука е и традиционалното јадење пивтии со пресна погача, а се верува дека ноќта спрема Богојавление самиот Бог се јавува во вид на бел голуб и оној кој што ќе го види ќе му биде исполнета желбата .
Според етнолозите, поинакви обреди се поврзуваат за руралните средини. Во козјачкиот регион Богојавление порано се празнувал два дена. Првиот ден се слават Машки Водици кога се капат и крштеваат само машките деца –првенци. Исто така на извор одат само момчињата , ја осветуваат водата со босилек, а потоа ја прскаат куќата и живината.
– Наредниот ден пак девојчињата исто така оделе на извор, биле облечени во народна носија, носеле венчиња на главата, оделе на извор земале вода и истиот процес го применувале како и машките деца за Водици со некое верување дека тоа го прават за среќа и благосостојба на семејството, изјави Анита Ѓорѓиовска, етнолог во Н.У. Музеј –Куманово
Етнолозите посочуваат дека на богојавленската вода и се припишуваат натприродни својства и лековита моќ.
-Откако ќе се земе од самата осветена вода утрото се носи дома се прска куќата, се пие водата на прагот од куќата со некое верување за здравје и среќа , свекрвата ја прска новата снаа во домот, се прска живината, стоката, болните деца, едноставно со верување да се заштити куќата од лошото, а воедно да се обезбеди среќа и напредок на семејствотом изјави Ѓорѓиовска.
Со Водици завршуваат некрстените денови и започнува циклус на пролетно-летните празници кога се изведуваат аграрско -магиски обреди со цел да се обезбеди плодност на нивите и посевите.
